إنتم فين يا بشر
الصيام ما قلش كدا
نقضي الليل تسالي وهزار
وبالنهار ننام للعشا
وان جيت أقول حرام
تقول النوم عباده
وأنا صومي بالشكل دا
يعني كدا إنت صايم
أمال صايم والحمد لله
وانت مالك يا حشري
دا بيني وبين ربنا
طيب والصلاه
ملهاش دعوه بالصيام
إزاي
أصلك ناقص علام
أنا
أيوه وأسأل كمان
طيب والذكاه
أخر يوم قبل ما يقوم الاذان
يعني هو دا الصيام
أمال
يا سلام
حد يا ناس يعلمه
حد يقول له ويفهمه
أن الصيام مش أي كلام
مش نوم واكل والسلام
مشقه وتعب بعدها حلاوه في النفوس
تمره واحده
وان شاء الله لقمه من غير غموس
الحسنه بعشره
والخير فيه محسوس
مستني تطلع الزكاة
قبل الاذان ما يقوم
طيب والفقير اللي
عاوز يجيب هدوم
خليك فاكر هتقابل
ربك بيوم معلوم
وساعتها عارفك تبكي
بحرقه وتقول يا رب أنا مظلوم
لا هو أنت كنت جاهل
ولا كنت غافل
ولا لسه ما صحيت من النوم
وأقولك علي العموم
كلمتين وبس
أقعد ساكت
ما أسمعش ليك حس
رمضان يعني إلتزام
مش بس بالمعني و شوية كلام
حلقه موصوله بالإيمان
صلاه وزكاه وقول معروف وصدقات
وصله أرحام
يعني تقريبا ماعدا الحج
كل أركان الإسلام
يا سلام
أمال كنت فاكر إيه
قوم ياالله لسه نايم ليه
طيب وإنت بتعمل كل ده
أنا مش مثالي
وربنا أعلم بحالي
وما يرتاح الا إللي قلبه خالي
العيشه مره
وحب النبي غالي
وطول عمري
حبيبي علي بالي
وقلبي وعقلي فداك يا نبي
وبذكرك دنيتي بتحلالي
ليست هناك تعليقات:
إرسال تعليق