......... صوت الناي .........
.......................................
صوتك ياصوت الناي حزين
مليان أنين
كان نفسي الآقي الدوا
تطيب جراحنا ..... سوا
عمال بتبدر في الهوا
دمعك لمين ..؟
صوتك ياصوت الناي عتاب
صوتك عذاب
سارح بترمي النوح
فاتح مسام الروح
والروح ماليها جروح
وجروحي تملى كتاب
صوتك ياصوت الناي دفيييين
واصل لفييييين .. ؟
واصل لأبعد مدى
مالي ...... الفضا
راجع ....... صدى
يصحى .... الحنين
صوتك ياصوت الناي سكن
صوتك شجن
رغم ...... السكات
مليان ......... آهات
بيصحي فينا ذكريات
نامت سنين
صوتك ياصوت الناي نغم
إعزف على وتر الألم
داوي القلوب
يمكن تتوب
لبسها توب
دمع الندم
صوتك ياناي مليان دموع
صوتك خشوع
دايما مصاحب رحلتي
ونيس معايا في وحدتي
واخد بإيدي في سكتي
وانا سكتي ملهاش رجوع
صوتك ياصوت الناي عفي
صوتك وفي
بيبل ..... ريق
ويفك ... ضيق
زي .... الشقيق
لكن خفي
صوتك ياصوت الناي صبابه
يحكي موال الزمن ويا الربابه
حبة فرح ...... حبة ندم
تحيي اللي ماتوا م العدم
بضحكه نسيت تترسم
في عيون غلابه
بضحكه نسيت تترسم
في عيون غلابه
.....................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية
ليست هناك تعليقات:
إرسال تعليق