ليه بس كدا يا ورده أسكندراني
كلامك الحزين وصورتك
علي وش الميه كانت عجباني
أعشق إسكندرية
بير مسعود وميامي وسيدي بشر
والمندره طول عمرها مجنناني
وأسالي العطارين والنبي دانييال
ومحطة الرمل
كل شوارعها ونواصيها عشقاني
سيبيها لله يا فوفا إسكندراني
طب شوفتي المناره
يا ميت خساره إطلعي فوق
وارمي أحزانك وارجعي حبي تاني
طب روحتي المنتزه
وشفت البحر من الشط التاني
أنا بعيد وسبت قلبي هناك
أسالي عم عبده بتاع السوداني
والا الست أماني
حلاوة إسكندرية وزماني
والمكتبه مرتع ليا ولاخواني
ولا بلاكازا والله بنيتها وبنياني
أقولك إيه تاني
ياريت أشيل الحزن عنك
أقولك نكته حلوة
بس اوعديني تضحكي
هي بايخه ومش عجباني
ذكريات ما قدرت أشيلها
من قلبي ومن كياني
يمكن تاني أقدر أشوفها
وتشوفني وترجع تهواني
يا ورده أسكندراني
مين علمك الاسيه
طول عمرك في قلبي وعنيه
معلش نسيتك شويه
دنيتي وحياتي مغلباني
بلاش تبقي كمان عزول
اشق منك يا قلبي خلجاتي
أيوه يا واش يا واش يا مرجيحه
ما تزعليهاش عارفه وعارفاني
لمي فلوسي إللي في بيير مسعود
كان لي عشم ترجعلي وتعود
كان لي عشم تفتكر قلبي وحناني
ولا فيروز لما تغني
دوبت قلوبنا بسهر الليالي
شوفت أيام النوة
شوفتي شطنا من جوه
ونغرق ونضحك من القلب من جوه
نغير هدومنا من المطره
ونرجع نغرق تاني
يا ورده إسكندراني
فاكره الوله حمودة وحنتيره
وحبنا إللي كان من غير منشأ ولا تسعيره
قلتلك راجع
قلت كداب وفضلت مش مصدقاني
إيه رأيك
أقول يا خلق وأصرخ
الحلوه ورده إسكندراني
وكانت مكدباني
ليست هناك تعليقات:
إرسال تعليق