ليه بقلم/ سيد عبدالوهاب

لِيه..

ليه الكلمة بتخرج توجع
ليه الضحكه بتخاف تطلع
ليه بنعذّب فِينا الطيّب
ليه بنحاول دايماً نخدع
ليه بِنبِيع دايماً أحلامنا
ليه نتنازِل للّى هايدفع
ليه تهزمنا المِحنة بسُرعه
أوّل ضربة معاها بنركع
ليه الخوف ساكن فِ قلوبنا
ليه من صدر الذُل بنرضع
ليه نتباهى بسوء أخلاقنا
ليه فى الأرض البُور نِزرع
ليه البنت تبيع فِى شرَفها
أول نظرة معاها بتِقلع
ليه نتهَرّب من وِحدِتنا
ليه الفرق مابِّينا بيوسع
ليه فى الحُزن قلُوبنا بتِبعد
ليه عن غِيرنا الخير نمنع
ليه النَفْس ساعات تتغَيّر
تِقلب دِيب لمّا بتِشبَع
ليه الكُره بيزرع فِينا
شُعلة غِلّ وفِينا هاتِولَع
ليه دِى بتحكى مليون معنى
للّى بيفهم مِنّى ويسمع
بقلم/ سيد عبدالوهاب