دنيا الحرافيش الشاعر محمد ضباشه

دنيا الحرافيش
الشاعر محمد ضباشه
------------
أخينا بيشتغل في يومين
ولأسبوعين بطال
وإن هلوا عليه جنهين
بياكلهم البقال
وغدا وعشا بالدين
وحاله أصبح حال
يرفع يديه للسما
يا مغير الأحوال

لف أخينا الجدع
علي تلتميت شغلة
البلغة دابت في رجله
وخطوته حبلي
نفسه في حمار يركبه
ياخده علي القبلة
دموعه تقول للحكومة
أنا رزقي معاكوا محال

بالصدفة وفي مقهي
قول أشتغل جارسون
استحمل غلاسة المعلم
وقال يا رب تهون
م الفجر للمغرب
يخدم في ألف زبون
وقبل ما يروح بيقبض
بكرة هتبقي عال

داقت عليه دنيته
وما في جيبه حتي جنية
مشي يسأل ويتسأل
والدمع مالي عينيه
ابن حلال قال له
علي سعادة البية
قال له الدولة تساعدك
لو جيت لنا متشال

صعب عليه الجدع
ودموعه نزلت سيل
وقال أبقي حرامي
في بلد تهد الحيل
ولا أبيع بانجو
ولا أعيشها عويل
قالوا كده تتحبس
في متاجرة أو نشال

طب يعمل أيه الجدع
يا خلق عميانة
لا فيه قانون يتوجد
لبطن شقيانة
وعيال بتاكل جوع
منكم وقرفانة
قالوا فوت علينا بكرة
إنتم علينا وبال

صحيح صدق اللي قال
كدة أو كدة هتفوت
وأنا عشان غلبان
طلبوا لحياتي الموت
وعرقي في بق سبع
ولحمي في بطن حوت
وحقي ممنوع مروره
وقافلينه بالأقفال