إوعاك تقول الشاعر محمد ضباشه

إوعاك تقول
الشاعر محمد ضباشه
------------
إوعاك تقول إن اللي داير
فـــي البلد شيء م الهزار
ولا حتي تار
ولا حتي صدفة منيله
ورجعت لنا زي التتار
دي المسألة وربي عار
زي شمس حارقة بس
تطلع لتاكل في العمار
زي عقل عاش مغيب
وبالدماء فاكره انتصار
زي أي جماعة وسخة
علي أرضنا زرعت دمار
زي أي فكر مؤذي
صدر لنا السلاح بنار
زي عتمة
زي ضلمة
فاردة جناحاتها بسيل
م الوبال
وأوعاك تصدق مهما قالوا
مسلمين
أو مجاهدين
اللي يقتل نفس غدر
يبقي مين
لا كان الإسلام أبوه
ولا حتي دينه من سنين
ولا جهادهم نصيبه جنة
ولا حتي هم موحدين
تبقي مخطط مرسوم لنا
والشمس كاتباه ع الجبين
واحنا بندفع الـتمن
علشان ولدنا مؤمنين