...... مضمون الحكايه ...... بقلمي الفلاح الفصيح معوض حلمي منشأة بطاش تمي الأمديد دقهلية

...... مضمون الحكايه ......

...................................

وكان ناوي يداوي 
الجرح بالفرحه
ويفتح قلبه للضحكه
وينسى الآآآه
فامقدرشي
عشان طبع الحياه جارحه
ودمعة عينه كات فضحاه
لف البلاد بالطول
وداس عرضها
لم البنات م الغول
وصان عرضها
ولأنه واحد منها
وفلاح فصيح
طينته أغلى من الدهب
وماهوش صفيح
زي الوتد ضهر وسند
بلسان صريح
حفر القناه بصبر وجلد
وف دنشواي ضهره انجلد
مصري بصحيح
ولا مره باع
ولا قام وشارك في الصراع
ولا عمره قال إنه جريح
عايش يادوب سطر ف روايه
بره مضمون الحكايه
مالهوش في أدوار الغوايه
ولا على صوته بالشكايه
ولا حتى همهم همهمات
رفع الرايات
ومابين ركام الذكريات
قاعد ومستنى بحنين
تايه بيسأل ع اللي فات
على عمر عدي من سنين
مسكون بعفريت الآآهات
وساعات ينسيه الأنين
ولأنه معجون بالسكات
وبيصاحب الليل الحزين
ونجومه تحكي له حكايات
عن فرح ناس ،
وناس مجروحين
وناس بتسهر بالساعات
تستعجل الصبح بحنين
يطلع يطبطب ع الجراح
يمسح آهات السهرانين
مليان ضنين من كام سنه
ماشي الطريق ناسي الأنا
وسط الهموم والعكننه
حلمه البسيط يوصل لغيط
فيه الأماني ممكنه
والصبح يطرح سوسنه
وينسى العنا بنسمة حنان
كان حضنه أكبر من ميدان
لأنه كان فدادين وفا
كان غله ماليه الغيط عيدان
طارحه السنابل والدفا
وبرغم قلبه المبتلي
ووشه البريئ
كان واد جريئ
شق الطريق زي الولي

شق الطريق زي الولي
..............................
بقلمي الفلاح الفصيح
معوض حلمي
منشأة بطاش
تمي الأمديد
دقهلية