قصيدة " ....... رمضان سألني عليكي ....... "
....... رمضان سألني عليكي .......
رمضان يا امه سألني عليكي
لما لقاني وماشافكيش قدامه
كان بيلاقي البهجه لما يلاقيكي
بس لقي الدموع في أكمامه
وكانت انواره بتنور عينيكي
وكانت فرحتك لما يهل هلاله
ونغمات الفوانيس في لياليكي
والمسحراتي يطبل علي مواله
وسجادتك فيها عرق إيديكي
وسبحتك كانت بتعد ايامه
كان خيره بيحووم حواليكي
وطول الليل بتدعي بتمامه
في كل لمه قلبي بيناديكي
واسمعك وإنتي بتمي صيامه
وستايرك لسه علي شبابيكي
وحسيس دعاكي في قيامه
عرف من عينيا اراضيكي
خدني في أحضانه بسلامه
ورفع إيديه يدعي ليكي
وابواب الدعاء مفتوحه في ايامه
وحسناته المكتوبه تراضيكي
لغاية ما يعلن مسك ختامه
......... حسن الشوان ................
للشاعر/ة/ حسن الشوان
تحت إشراف
د. منى ضيا
رئيس مجلس الإدارة د. منى ضيا
ليست هناك تعليقات:
إرسال تعليق