قصيدة " كنت فاكراك بتحبّني "
Abdelkhalek Jalaleddine Barghout
كنت فاكراك بتحبّني
محتاجة ألِم جرحي و اللي باقي من وجع
قلبي اللي حَبّك سنين
يا خسارة فيك يوم انخدع!
من قساوتك عليّا، ديماً محسّسني بالفزع
لحد ما الحنان يموت
لحد ما الشّوق بينّا انقطع
كنت فاكراك بتحبّني
بتغير عليا...
و وقت الشدة ألاقيك جدع
بس قلبك مَلوش في الحب
غير الأذية و الطّمَع
ما انا ياما عشقتك
و يمكن باعشقك لسّه
و قلبي اللي حَبّك زمان
عمرو ما حاول ف يوم يقسى
و حتى البُكا فعيني يزيد
أضمد جراحي و مش بنسى
لسه فاكرة يوم تلاقينا
و السلام ما بينّا كان همسة
حسّيت ساعتها بالكسوف
و نبض قلبي يتسارع
صار الهوى بيّا يطوف
و نهار أبويا مش طالع
كانت مشاعري مليانة خوف
و الناس بصَّلنا في الشارع
تلاقينا...
و ما كانش بينّا معاد إنّما!
دي مشيئة ربِّنا من فوق السما
حقيقي حبيتك، و انت أول حب فحياتي
جوّاي فقلبي خبيتك
لأني ساذجة و على نيّاتي
ما ليش سوابق في الغرام
و لا العلاقات المتحرّمة
تلاقينا...
ولأول مرة بشوف الدنيا فوشّي متبسّمة
قلت لك بَحبّك، و لو زيِّي بتحبّني!!!
مَتيجي تطلبني، و من إيد أبويا تخطبني
على نهج السنة و الكتاب
و فضِلت بعديها سنتين...
مستنية منّك رَدّ الجواب
في كل مرة تطلع لي فيها بحكاية
مرة تقول ان الشغلانة مقَفّلة ابوابها
و مرة تقول عايز تكَمّل القراية
ما بقيتش عارفة إيه آخرتها معاك
و لّا احنا لسه في البداية
فضِلت مراقباك، بس من الشباك
أهو حبيبي جي، أهو حبيبي راح
قلبي مكتوي كي، و دمعي مخاصم الافراح
و حتى بالي مش مرتاح
لأني مش عارفاك كنت فين و لا جاي منين
بس عارفة اللي جوّايا مليان أنين
لحد ما أسمع صوتك فالتلفون بالليل متأخّر
تراضي شوقي بكلمتين
و شوقي ما عمرو يتقَدّر
و ازّاي فيوم اتقدّرو؟
و انت قلبك متحجّر و قاسي!
مش دريان بالمشاعر
و مش معبّر نبضة احساسي
بس كِذب فكذب، و الصدمة كانت قوية
أنا اللي مغلّبني الحب
و انت عم تخطّط للخطية
و البنت اللي انت بتجري وراها دي الوقتِ
تبقا صديقتي و صحبتي
ما هي حكيت لي ع الكلام اللي دار بينكم
و انك عاوز تخطبها
يا برودة دمّك يا سيدي لما الشِّعر تسمّعها!!!
و انا اللي سهرانة وحدي
و كلمة { ح ب } مش عارفة أزّاي اجمّعها
لأ!!! و طلِعت انا اللي مش عارفة أغازل
و لا عارفة ابوس
ده انت يرضيك الحرام
و لا ناوي عَ كرامتي تدوس
ده انا على قد ما حبيتك... باكرهك
ما انت طلعت واد صايع
و اللي يفْضل يلعب بذيلو
أكيد مصيرو يكون ضايع
و دي الوقت روح من غير وداع
و القلب اللي يهواك، خلاص... ما بقاش نافع
و انتِ يا اختي!
خلّي بالك من واحد يشتريك اليوم
و بكرا يصير بايع
### عبد الخالق برغوط ###
للشاعر/ة/ Abdelkhalek Jalaleddine Barghout
تحت إشراف
د. منى ضيا
رئيس مجلس الإدارة د. منى ضيا
ليست هناك تعليقات:
إرسال تعليق