قصيدة " قاعدة مصطبه "، بقلم الشاعر،، ياسر عيد

قصيدة " قاعدة مصطبه "

قاعدة مصطبه

من وحي الصورة

( ١ )

أم أحمد ..

أيوه يا ام سعد

العصر جايه ام راضي

هاستناكي لما تيجي نحكي حبه

عيني حاضر

دي الألف حلوه

أيوه ياختي الواحده حسه ..

ساكته ليه حسه إيه

لما تيجي نقعد ونحكي

أهو نلقي هم ونحكي فيه ..

ياختي ربك مايجيبش هم

شوفي يلا وراكي إيه

انا رايحه أكل الطيور

روحي ياختي وماتغيبيش

يارب ارضك خضرا دايما

ما ييجي مره يزورها بور ..

( ٢ )

ياخوانا ياللي هنا

هما هاجروا ولا إيه

لحظات سكون واهو جاها رد

عوافي عليكي يا أم راضي

الله يعافيكي ياحبيبتي

سعد بيسأل فينه راضي

ويا أبوه في الغيط بيسقي

والله شاطر

دا الواد مطلع عين أبوه ولاهو سامع الكلام

ينبح في حسه ياواد تعالي

ويرد يقوله انا عايز أنام

ثواني اجيب عزال الشاي

وانادي ام احمد تقعد معانا

قاعدتها حلوه وفيها ونسه ..

( ٣ )

بالحضن ياختي ليكي واحشه

ايه دا كله يا ام راضي

ليه ياختي الغيبه دي ..

موسم ياختي غصب عني

مانتي عارفه ف كل زرعه

فوق دماغي شايله الهم وعيني طالعه

طمنيني عامله ايه وازي حالك ..

حامدينه دايما ياحبيبتي

خاسه ليه كدا ايه جرالك

وابو راضي ازي حاله ..

علي راضي وابو راضي واللي جراله ..

ايه ياختي ماله ..

بنت الجيران شاغلاله باله ..

حاطه بويه علي وشها وتشوفيها عروسة المولد ..

يادي النيله ع الرجاله

عينهم زايغه ع المياعه

وتشوفيهم زي الفرخه جوه القاعه ..

بنت مين ونروح نقوله ..

هاتقولي ايه وتقولي لمين

حتي ابوها مافيهش نخوه ..

وانا اللي جايه اشكي ليكوا

وانتوا اللي فيكوا مكفيكوا

يعني ايه الحل يعني

بعد الهم وصبر سنين

وف عيشه سوده ومهببه

اخرتنا راميه وقاعدة مصطبه ..

صوتي يا ام احمد علي ام راضي

ابو راضي ليلته سوده الليلادي

قاعدة مصطبه

ياسرعيد

للشاعر/ة/ الشاعر ياسر

تحت إشراف

د. منى ضيا

رئيس مجلس الإدارة ‏ د. منى ضيا