آه یاستی💥 بقلم شاعر العامیه//معوض حلمی👈

...........   آآآه  ياستي   ...........
.........................................

كل  يوم  بيفوت  عليا
باجيب  ملامحك  م  الخيال
لسه همسك  نبضه  فيا
لسه  مشتاق  للجمال
وإزاي  ادور  ع الدلال 
وهواكي  جاه

لمسة إيديكي ع الهدوم  والطبطبه
باتوضي منها كل يوم قبل الفروض
حافظ  دعاكي  زي   نسمه  قريبه
تراتيل  صبا لطفل بيتهجي السجود
قلبه الودود بيعبي من طيفك  دعاه

من   كام   سنه  وانت  ف  غياب
لكن   مكانك   ياأنا  ، لساه   هنا
لسه  عطرك  بيحتوينا  ومستطاب
لسه   سيرتك  باقيه  فينا  حنينه
ع الفطره وانتي آمنه كنتي الحياه

مليتي  قلبي  من  حنانك
وجيت  زمان  مافيهوش  حنان
لكني  ماسك  عود  ريحانك
وباهدي  عطرك  للي  خان
مانتي الهدايه لكل شارد 
واللي  ضاع  منه مناه

لو  جيتي  بس  دقيقه  واحده
وشوفتي  حالي  بالوما
هاصعب  عليكي  م  الأسيه
وانا  كنت  بيكي 
طير  وطاير  في  السما
كنتي الأماني  الممكنه 
كنتي  مواسيه
كنتي  لعنيا  الشوف  وبعد  منك
شوفي  بيصارع  عماه

وانا  لسه  فاكرك  آآآه  ياستي
كل  تفاصيلك  حاسبها
ولا  مره  عن  إلهامي  غيبتي
وإزاي  تغيب  القسمه 
عن  صاحب  نصيبها
والقدر  واصل  مابينا  لمنتهاه

بعدك  ياستي
مفيش  كلام  بيداوي  جرح
دايما  جروحي  المفتوحين 
تنده  عليكي
ولا نسمه  جايه  وجايبه  فرح
ولا  عاد  عينين  م الطيبين
تشبه  عينيكي
وعنيكي  كانوا  المركبه 
وطوق  للنجاه

قبل  مايفارقك  سر  الإله 
أنا  روحي  طلعت
وجالي  سهم  ف  قلبي  صابني
وابويا  جابلك  من  غداه 
قولتي  له  قنعت
حسيت  بلهفة  وشوق  دبحني
ساعتها  بس  بقيت  جسد
عن  روحه  تاه

ساعتها  بس  بقيت  جسد 
عن  روحه  تاه
.........................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية