قصيدة " شعور جوايا مش مفهوم "
Samir Mahmoud
شعور جوايا مش مفهوم
شعور حالف عليا يلوم
شعور قاسي قوي بيوجع
على وجعه بنام وبقوم
..................
بحس إني غريب عني
حاجات فيا مهيش مني
حاجات عايشة لكن ماتت
حاجات ماتت بتألمني؟!
...............
انا ماشي لكن واقف
انا باصص ومش شايف
انا قافل على جراحي
على نفسي انا آسف
...............
جراح الناس بداويها
وانا جراحي مليش فيها
عيوني م البكا ملت
واقول ماشي واعديها
............
ولا لغيري انا بشكي
ولا بصرخ انا وابكي
وكل مبنسى يادنيا
على همومي بتتكي
...............
براح الكون مابيساعني
ولا واحد بيسمعني
وكل حبيب انا صونته
بكل سهولة بيبيعني
..............
وطول عمري وانا الآخر
بطاطي لجرحي واتاخر
ولا رافض ولا بشكي
ولا ناقم ولا ساخر
#سميرمحمود
للشاعر/ة/ Samir Mahmoud
تحت إشراف
د. منى ضيا
رئيس مجلس الإدارة د. منى ضيا
ليست هناك تعليقات:
إرسال تعليق