فاكره**!بقلم الشاعر / إبراهيم الحلواني شوقي✨✨

فاكره
..................
تعالى نرجع للوراء سنين
فاكره لما كنا صغيرين

قبل الشعر الأبيض
وقبل مرور السنين

والشارع كله عيله
وكله ناس طيبين

كنا نقسم الرغيف
وعمر ما كان بيننا مسكين

فاكره خلتك حميده وشكريه
وعمك بغدادى ومحمدين

كانو صابرين على الحياه
عاشوها أيام وسنين

 حلم كل واحد يرضى ربه
ولا يكون من الضالين

ولو سألته حلم حياتك ايه
يقول أهو عايشين

فاكره لما كنا نجرى ونلعب
ونعمل عروسه من الطين

ولا طياره من الورق تعدى
 البر الثانى ونضحك فرحين

 لما كنا نلعب وادافع عنك
 بالعصى كأنها سيف بحدين

والسندوتش ابو سكر
نقسمه بيننا نصفين

ولما نعطش نجرى و نشرب
من القله ام ودنين

فاكره لما كنت أمسك يدك
من الكسوف تغمضى العينين

فاكره لما أنشغل القلب بكى
وأشتعل الحب سنين

ولما كنتى تندهى بأعلى الصوت
حبيبى ونور العين

وصدى الصوت بين المزارع
يتكرر مره ومرتين

اكيد فاكره مهما مرت
الايام ومرت السنين
........................
بقلم.ابراهيم الحلوانى شوقى