الف مبروك الشاعر / ة عادل علي
مش قادر أصدق
إنك خرجتى من دنيتى
وبرضوا خايف من فراق
زود شعورى بالخوف وزود وحدتى
ولسه شايف طيفك قصادى
دايما ينادى
وعليا منور سكتى
لسه يا امى
فاكرك وصوتك بينادينى
بلاش تطول فى الغياب يا ضى عينى
يا رحله حلوه فى الحياه واجمل سنينى
بلاش تطول فى الغياب
الغييه غربه وليا صعبه وأكبر عذاب
ايوه مشتاقلك يا أمي
وازاى تروحى وتغيبى عنى
مين تانى بعدك اشكيله همى
وقلبه يسعنى
دى الدنيا جنه وانتى فى حضنى
وفراقك انتى الوحيد وجعنى
لكنى مؤمن بالقدر
ومن رحيل أغلى البشر
أيوه مشتاقلك يا امى
ونفسى اشوف تانى ضحتك
عارفه ايه وحشنى منك
كان هو مصدر فرحتى
طله حلوه من عنيكى
ولمسه دافيه من ايديكى
بالكون ده كله ودعوه منك
بيها تكمل فرحتى
فى لحظه واحده بتروحى منى
اخدتى روحى وبعدتى عنى
ودنيتى تستغنى عنك
وايه فاضلى تانى بعدك
نفسى اقولك اشتقتلك
اشتقت قربك والحنان
نفسى يرجع بينا الزمان
لما اجيلك واقعد معاك بالساعات
نحكى عن ايام زمان وكل اللى فات
نفتكر مع بعض اجمل ذكريات
واحلى حكايات
ااه يا أمى وحشنى قربك
عمرى ما ارتحت إلا جنبك
نفسى الاقى نفسى فى حضنك
كنت بانسى الدنيا فيه
ااه يا امى اشتقت له فين الاقيه
فاكرو دايما وبحن له وهموت عليه
نفسى يرجع معاك تانى بيا الزمان
واكون قريب يا قلب طيب
يا نبع صافى من الحنان
ااه يا امى لسه فاكر ضحتك
وسهرك علينا
ما علينا ضاعت صحتك
حتى لسه برضوا فاكر كلمتك
كل شىء فى الدنيا دى يا ابنى بأوان
نفسى يرجع معاك تانى بيا الزمان
واكون قريب يا قلب طيب
يا نبع صافى من الحنان
أيوه حاسس من يوم ماغبتى
نورى انطفى
كل احساس بالأمان
بعدك يا امى فجأه اختفى
نفسى تاخدينى فى حضنك
واعيش معاكى لحظه صفا
لما الاقى نفسى فى متاهه دنيتى
كنت اجيلك اقعد معاك بالساعات
تكتمل فى القرب منك فرحتى
واحنا بنحكى مع بعض أجمل ذكريات
دلوقت لما الشوق ياخدنى
الاقينى جايلك
بس حضنك مش لاقيه
وف مكان مش هو بيتنا
بس فيه نهايه حياتنا
انت نايمه وساكنه فيه
نفس اعيش لحظه حنان
نفسى يرجع بينا الزمان
وأنا بين ايديكى وجوه حضنك
وانسى كل الدنيا فيه
نفسى يرجع معاك تانى بيا الزمان
بس المكان من غيرك أنت
مش ده المكان
حتى بيتنا واللمه فيه راحت كمان
بيتنا بعدك
لاء يا أمى مش ده بيتنا
الدنيا بعدك فرقتنا وغربتنا
ولسه مش قادر أصدق
إن دى نهايه حياتنا
نفسى تانى معاك يرجع بينا الزمان
وأكون قريب يا قلب طيب
يا نبع صافى من الحنان 💙
ااه يا امى اشتقت ليكى
نفسى عينى تحضن عنيكى
وارمى نفسى بين ايديكى
روحى ياامه هتموت عليكى
بعد امى وحضن امى
اى حب تانى هيساويكى
لسه مش قادر أصدق
إليك امى يا أحب القلوب إلى قلبى
رحمك الله وجميع آباء وأمهات المسلمين
أمين .... 💚 عادل علي
ليست هناك تعليقات:
إرسال تعليق