" زجل"
حالة موشومة
والناس فيها مهمومة
حالة موشومة
وانفاس من الخير معدومة
الواقف ناسي الكاعد
والراكب ناسي الماشي
والخو على خوه حاقد
والجار من الجار إقاسي
حالة مرعونة
القلوب بالكدر مرهونة
من الظلم شاكية مغبونة
محكورة مهمشة مركونة
بالفقر والزلط مجنونة
اللي شبع طغا واتنطع
واللي اتنصب زاد اتربع
القوي تجبر كي السبع
الضعيف رجعوه ضبع
حالة امقشفة
ما بقى صدق لا أوفا
ما بقات همة لا عفا
لكثير فالأمة ضارباه التلفا
والصاحي سدو عليه الدفا
خيرها العديان فيه مصرفا
أومالين الشي إيديهم امكتفا
حالة عيانة
سوايعا قصيرة زربانة
لاحد فيها عندو الكانة
لا ميزان مكاد لا مكانة
بحال الشهر بحال السمانة
تقادو لكتاف والريوس
ما تفرق الرايس والمريوس
اللسان حلو والمكر مدسوس
كلشي صبح باسل مسوس
لا نقى لا تقوى لاصرحة
لا هنا لا وقر لا راحة
بقلة الدين عمرات الساحة
الناس تايها مدوخة دواحة
كلا طالق لراسو لعنان
كلا فلت من إيديه اللجام
اتعقل وافطن يا ذاك الإنسان
سعى للبر والخير ونشد السلام
بقلم.
محمد السوارتي الادريسي
الشاعر /ة / محمد السوارتي
تحت إشراف رئيس مجلس الإدارة السفيرة د. منى ضيا (منى داوود ضيا)
ليست هناك تعليقات:
إرسال تعليق