لحاف الصبر.
عبدالله رجب ابوعدنان
يا أمه شدي لحاف الصبر و اتغطي
هما اللي باعوكي ولا إنتي هونتي
بطانية الفقير خوف
وأمل تملي مكسوف
قاسي برد الشتا والخريف
وياما اتحملتي و صبرتي
جسمك مكسر م الوجع
قلبي عليكي اتخلع
الحزن فينا مسمع
تبكي ليه وتدمع
مش حاسه بيكي يا حبيبتي
يا نايمه ع الرصيف
وقلبك على ولدك ملهوف
لسه موجود القلب النضيف
وعلى خدي مرسومه دمعتي
ياما قالو ف الصبر مواويل
لكن ما جربوش برد الليل
وما يحس بالعليل غير العليل
حبك مش محتاج دليل
راهنتي على حبك وف الآخر خسرتي
ولا ليكي عزا ولا صيوان
قلب البشر حجر صوان
وليل كله بكا و أحزان
لسه بتدوري ع الأمان
انا زيك نسيت إني إنسان
انا زيك مسروقه مني ضحكتي
باعوكي ف ليل طويل
وناس غواهم الميل
ليكي الجنه وليهم الويل
ياما نفسي اردلك الجميل
وبراهن على حبك ب جثتي
قومي وانفضي غبار الطل
إبنك لا مل ولا كل
بكره الصبح راح يهل
وشمس الخير تطل
وعشقك مكتوب على باب تربتي
كنت فاكر إن الدموع راح تفيد
ولا حد ممكن يوفي بالوعود
لكن ف القلوب مش دم لأ صديد
ورب العلا ف علاة موجود
جرحك م الأيام شديد
انا إبنك زي كل ولادك
وبدور من سنين على طريقي وسكتي
ارفعي وشك للسما وناجي
للي ساكنين ف برج عاجي
يوم القيامة عند ربك تحاجي
كام ليله باتت والدمع باكي
وسامحيني لو مش قادر أوصل لرضاكي
وابكي على وجعك يا ستي
ليست هناك تعليقات:
إرسال تعليق