وشوشت قلبي (نثر لبناني
وشوشت قلبي ت تنام العين
بعد ما كترت الدمعات ع خدودي
وصرت ضايعة بين خدي وبين
إنك تسألني كيف و وين
وين نظراتك رميوني
وصارت اللمسات
تقارب الآهات
تقول بيكفي بقا يا مجنوني
ولما ع كتف الآه ذكرني
وبهمس الحب جننِّي
وصارت النظرات
تزوغ من الهمسات
وبإيدو المش عاقلي
يطير الشعرات
وصارت الساعات
تمشي ع كيف إبليس
والضلع يتنهد من قلب القميص
بتفك اسرارو
وبتبكل زرارو
وما عرفت شو بقلو
بشيلهن لإيديه أو بقلو يضلو
بعد ما الدمعات من عيوني فارو
وشعلت خدود الصدر من نارو
وصارت الأفكار من جنونها يغارو
دخلك يا عتم الليل فل
وغطي ع عيون الوفا ولا تضل
ع دموع عيوني ال إحتارو
تمشي يا هاك الصبح ع دربك
حاجي مخلي الأفكار تتلبك
قلي يا نور الشمس واحكي عن الوفا
احكي بعتم البال وشو انقال عن الجفا
ما بدي من حدا إهتم
صاير حبك متغلغل بقلب الدم
وصايرة إحلم بليالي حب وصفا
مشتاقة يا حبي عيوني تشوف الغفا
وما خاف من حكي العزول
ويقول شو يقول وشو بدو يقول
وكل فكري رايح لبعيد
وهو كلمات الغزل بيعيد
والهوى الهب بهاك الوقت
صار يعطي للغزل مواعيد
ويقول لك ايه انا بحبك
وبموت من لفتة على دربك
وإنسى وانا قدامك اني انسان
وصير مشغول ع لفتة الفستان
وقول يا رب يا منان يا أعظم فنان
ان خلقت متل البحبها حيران
وانا من لهفتي عم طير
بين ايديه متل طفل زغير
ونرجع ع درب البيت عصريي
والليل كان عم يبلش يعتم عليي
وصارت الايدين ع السكت تتلاقى
وبعد كل هالشي بعدها مشتاقة
نرجع ع درب الحب
نوشوش بإسم القلب
كل الشجر والعصافير
الكانت من حولنا بتطير
لا تحاولو تفضحو الاسرار
ال صار معنا دايما دايما .....بيصير
بقلم #د__منى_ضيا (لبنان
جميع الحقوق محفوظة
ليست هناك تعليقات:
إرسال تعليق