(طير فِ إيد عيل يتيم ( "
.. بالعامية المصرية ..
.. من القصص الشعرى ..
للطلائع .
النص كامل ..
المجموعة القصصية الثالثة ..
............ (طير فِ إيد عيل يتيم ( ..
زار خيالى .. نص غالى .. طار ببالى .. من سنين .
شفته زين .. اصطاده عقلى .. قلت لازم أقيده .. بقلم أمين ..
أحسن يطير.. ويروح بعيييييد ..!
جات فِ إيد الواد (زياد) ..عملة فضة ..عيار سمين.
يوم م كانت ليها شنة ورنتين .
كات ( بريزة) ..عشر قروش .. إدهالو فى عيد ميلاده أبوه ( يزيد ) ..
وفِ العشية .. خالو ( عمر) وعمو ( زيد )
خلوها لو عشرتين ..
إشترى بيضة بخمسة .. وبدَّل الباقى قروش
جوه حصالته بدرهم ..
وكل م يزفه هواه .. بالقروش يفضل يشخلل .. يفرح إن معاه ..
فلوووووووووس..!
(المشاركة) ف عقله باركة ؛ و(الأمل) فارد جناحاته على فكره وفارش ع المكان
أخته كات بتربى بطة .. باضت البطة ورقدت ..راح حداها لقاها
حاطه.. ف حضنها بيضها المصهلل.. دافى .. متعافى .. بيصهل .. حط
بيضة الفرخة بينهم .. يقصد المحروس يكمل..
صُحبة البيض المكور .. كل يوم الصبح بدرى
.. يروح ويدى .. أكل للبطة ومية .
عدى ع الحال ده كتير .. ؟ ..قبل بدر الشهر يكمل فط صوت م البيض يصوصو..طل ..شافه ..
بين حنايا كفوفه شاله..(طير ف إيد عيل ضعييييف) .. ساب بقيت
البيض مكانه ..باقى على تفريخه مده..صوصو الكتكوت فِ كفه
..جوه حجره الدافى حطه.. أكله..وسقاه.. ببؤه..
راح ينام خباه ف حضنه .. فى المعاد البط فرّخ ..رجّع الكتكوت لأمه
رجّعه البطة تضمه .
عاش مع البطات شهور .. بعدها بانت الأمور ..
(فرخة زهر الفول.. تهلل ).
فى تمام عشرين سبوع .. باضت الفرخة الشقية..
كل يوم الصبح بيضة.يجمع البيض جوه سلة..
يروح يبيعه ف سوق بلدهم .. شاف ف سوق الطير ف ناحية ..
( وزة ) لسّه فرخة ( المغامرة ) ف روحه غامرة
حوض أماله وروض مناه .. إشتراها..إشتراها وكله فرحة
(طير ف إيد عيل عنبببببببببببببد ..!) ..وِزة بيضة عيونها
سودة .. ريشها بيلالى ويُبرق .
وهوه راجع جا فِ خاطره .. جات له فكرة .. قال لنفسه ..
بعد مدة .. تكبر الوزة وتكبر ..
تبيض فِ دارنا ألف بيضة .. يفقس البيض يبقى (وز) ..
أشتِرى بالوزة ( معزة ) وبعد مدة أشترى بالمعزة (عِجلة) (بيبى) بقرة ..
يكبر البيبى ويبلغ .. يبقى بقرة .. تولد البقرة وتحلب ..
اللبن طازة فنشرب .. إشطه نلهط ..
زبدة ناكل .. جبنة نِخزِن ..
تولد البقرة وتولد .. يتملى دارنا الكبير .. بقطيع بقر الحليب .
(الامل) جواه بيكبر .. و(الوفا) سابق مناه .. تبقى مزرعة للحليب ..
يشتغل فيها البطالى .. نحلب البقرات ونسقى كل جيراننا اليتامى ..
نسقى أطفال الغلابة .. اللى فى العالم الفقير .
والولد راجع بسرعة .. عدّى جسر ف ريحه ترعة ..
الربيع فارش بساطه..والطيور وقت التناسل ..
والزهور بتزيد تواصل .. والنسيم بيميل (يبوس) الغصون وعيون كواحل . !
شافت الوزة الحشود ..احتفال بعيد الربيع ..عُرس سنوى..
يوم ثقافى جوه ترعة .. قطيع بديع من وز بلدى .. وز مصرى
أصلى حُر.. دمه سخن .. ضاق به صدره .. فاض به صبره
قام عمل ع الكبت ثورة..لأ..مظاهرة..لأ..لأ.. تظاهرة..لاااااااء دى حفلة..أيوه حفلة ..حفلة..حفلة ..
(طير فى إيد عيل يتيم) فطت الوزة فِ لحظة ..
للهوى انشدت بقوة ..طارت الوزة لفوق.. ويا شوقها حلقت..حلقت
وتحققت ليها الحياة ..وبقالها عيلة .. حطت الوزة بدلالها ع الدكورة ..
من جمالها..صوت وصورة ..الدكورة زاغت عينيها ..
الدكورة زاغت
عينيها.. غطست الوزة وغابت.. الولد قلقان عليها..
غابت الوزة وغابت.
بعد مدة جات وعامت.. الولد واقف فى حيرة..
بيناديها وهيه م النشوة بعيدة
حتى لو سامعة نداه أو نبض قلبه..
مش هترجع مرة تانية لنار جفاه..
مش هترجع مرة تانية للقفص أو جوه عشه..
بيناديها ومش لا قيها (انتى فين يا
أحلى وزة)..؟ ولو لقاها ازاى يجيبها..
ضاعت الوزة عليه.. ضاعت الوزة
عليه بعد ما كات بين ايديه.. وقصاد عنيه..
ضاعت الوزة وضاعت
كل أحلامه الى كانت .
وبعد ما رجول خاطره تعبت م الوقوف
وبعد ما جفون العيون اتورمت بنار الدموع..
فوض الأمر لربه
واحتسب تعبه وشقاه عند الالّه..
واسترجعه فى بلوته.. وطلب منه العوض
وانسحب..انسحب وراح مروح ع البلد ...........
اّااااااااااه يا اااااااا بلد !!
(الولد ده كله همة.. وله عزيمة من حديد)
له عزيمة من حديد ..الولد فكر يكرر ..
تجربة صابها الفشل..
مش عشان الفكرة هايفة ..أو غلط..لأ...
الفشل كان لجل ضعفه..
وصغر سنه للأسف.. الولد فكر يكرر فكرته ..
بعد ما يعرف يصلح غلطته..
مرة تانية أكيد هينجح.. (الله اكبر) لما ياخد باله أكتر ..
زنده يقوى..
عقله يكبر.. نخله يطرح ..سقف عشة لكل طير ..
سقف عشة لكل طير
وايد مقشه لكل ديب .. وحبل ليف.......
كالسلسلة لكل دابة مبرطعة
ولأى تور فى المزرعة ..
أبيض .. أوأحمر .. قيد حديد .. !
............................
تمت القصة ..
كلمات / محمد عليش متولى
ليست هناك تعليقات:
إرسال تعليق