عن إبداعه بـِ " ♡●●●●● قصة ما جرى ●●●●♡ "
زجل مغربي
♡●●●●● قصة ما جرى ●●●●♡
مَا انا الاّ بْشَر * دوَّخْني زِين كِقْمَر *
ما صَبْتْ صْبَر يا سْيادي سَمْعُو نَحكِي ما جْرَى ●●●
سَلْبَتْني زِينْة الشّْفَر * بْخَصلَة نَزْلَتْ من الشْعَر *
لُونْها ذَهْبي و يَا سْيَادِي تَشْبَه خْيُوط الذْرِة ●●●
وْجَهْهَا يَشْرَق كِفْجَر * زِينَة من الرَّاس للِظّفَر *
عْلِيهَا لَوْقَار يا سْيادي تْبَان عْفِيفَة و طاهْرَة ●●●
رْشِيقَة و لُونْها سْمَر * عْسِيلة و عْلِيها السَّر *
نَعْشَق الشّهْد يا سْيادي نَخْلة بِبْلُوح ثَامْرِة●●●
لَغْرام في قلبي حْفَر * صار صَايَكْنِي و كَيْجَرّ *
وَانَا مَجْرور يا سْيادي ناسي دُنْيا و لاَخْرَى ●●●
ما عُدْت نْغَضّ في بْصَر * و لَحْيَا من عِيني هْجَر *
طاير حاير يا سْيادي و حتى العيون طايرة ●●●
سْهِيتْ و شِيطَاني حْضَر * صَرْتْ نَنْظر فِينْ مَا نْظَر *
و عِين يَبْلِيس يا سْيادي رَا تْعَرْفُوها فَاجْرة ●●●
عِينِي ما فَارْق لَخْصَر * ضَعْت و مِيزاني خْسَر *
و مِن حِين لْحِين يا سْيادي عِينِي تَرْحَل زَايْرَة ●●●
رِيت الرُّكْبَة و النّْحَر * و رُمّان مَدْفُون فالصّْدَر *
رِيتْنِي مَتْلُوف يا سْيادي و طَحتْ طِيحَة وَاعرَة ●●●
رْسَمْت الضّحكة فالثّْغَر * و قُلْتْ نْسَالَك يا قْمَر *
لمّا لفَّتْ يا سْيادي كْلَمْتِي صَبْحَت عَاكْرَة ●●●
و كْلامِي مِنِّي نْفَر * حتّى حَرْف منُّو مَا ظْهَر *
مات الحُوت يا سْيادي وصَارت الحِيرَة حايْرَة ●●●
صار وجهي بْلَحْيَا حْمَر * و قلبي بْهْيَامْها عْمَر *
لكن مَتْلوف يا سْيادي و على مَحْيايْ ظاهْرَة ●●●
لحظة كأنّْها شْهَر * و الدَّق في قلبي كْثَر *
و هِيَ تَنْظَر يا سْيادي وَانَا حْروفِي مْسافْرَة ●●●
ما عْرَفْت نْكَرّ و لا نْفَرّ * و صَرْت نْفَكّر بِجْهَر *
خَرْجَت كَلْمات يا سْيادي ما عْرَفْتْها كِيف دَايْرَة ●●●
قالت سرَّك ما عادْ سَرّ * حُبّك بَان ما فِيه شَرّ *
يْلاَ تْرِيد تْقَابْل حْبابي هَانِي لِلْبِيت سَايْرَة ●●●
شْرِيت مْرَشَّة بالزّْهَر * سُكّر حْلِيب و تْمَر *
و رُحْتْ مْعاها يا سْيادي و هادي قصَّة ما جْرَى ●●●
يزيد علوي اسماعيلي
ليست هناك تعليقات:
إرسال تعليق