(((شهر عبادة)))
شهر عبادة وفيه الناس
ناس بتصلي لخالق الناس
وناس بتصلي عشان الناس
وناس لإيمانها وليها أساس
ناس مشغولة بآخر الجولة
عايشة الدور ومعاها محاولة
وناس مشغولة بالفوازير
وغيرهم قاعد يلعب طاولة
في المستشفى كتير انواع
ويا مرضهم صومهم ضاع
إيشي مجنون إيشي مبطون
واللي بيشكي دوخة
وصداع
واللي بصبره مرضه يهون
واللى ينادى يا حول الله
واللي يقول محتاج لله
واللى ف بيته الإحساس تاه
شهر كريم مليان بركات
واللي يفكر يبني بيوت
واللي يسَبِح ف الملكوت
واللي بيجري لاجل القوت
واللي حياته تملي سكوت
واللي يشد الناس لفطار
واللي يخاف من آخره ونار
واللي فطاره بدون أعذار
واللي شاغلي الدار بعزومة
والأنوار حوالين الدار
شوف الحكمة من رمضان
شوفها وعيشها ف أهل زمان
صوم وعبادة وحب لدينهم
ويا البسمة فى وش جيران
***
كل عام وحضراتكم بخير
مع احوال الناس فى رمضان
تحياتى/ جابر الأسد
ليست هناك تعليقات:
إرسال تعليق