ياضيف خفيف رايح على فين ؟ ..... ماشى وواخد النور وياك
أيام غيابك زى سنيـــن ..... قلوبنا باكية بتجرى وراك
...................
بتقول هترجع بعد شهور ..... يامين يعيش لما هترجع
ده الكل مغمور أو مشهور ..... لما مشيت بات يتوجـع
..............
الدنيا لما بتيجى أمان ..... ونور فى كل مكان واضح
فيك الفقير يشعر بحنان ..... واللى مقاطعناأهو جه وسامح
.............
رحمة وزيادة ف أرزاقنا ..... وكل فرض بقى بسبعين
ورباط إلهى بيجمعنــا ..... لما هتمشى يلمنا ميـن ؟
..............
فيك الونس ليل ويا نهار ..... أخلاق سخاء جود ومحبة
وكل ده بتمشى بينهار ..... بودى لو تقعد حبـــة
..............
شياطينا فيك اهى مربوطة ..... لياليك جميلة ووردية
ونفوسنا فيك أهى مظبوطة ..... بعدك ضلال هو وهي
................
لكن على العهد محافظين ..... واللى احنا عشناه فيك قاعد
صيام قيام قرآن وآمين ..... بعد الدعاء قلبنا صامــد
.................
الناس بتتمناك على طول ..... ياريت تكون العام كلــه
يتبدل الحال مش معقول ..... وكإننا ماعشنا ف ضلـه
................
ممكن يكون العام رمضان ..... لو عشنا زى سلف صالح
وساعتها يرجع لينا أمان ..... مع العبادة ونتصالـــح
...............
مع السلامة ياشهر فضيل ..... فى قلبنا وهنســـتناك
والشوق ف قلبنا صبح وليل ..... وأملنا ف الله تانى نلقاك
ليست هناك تعليقات:
إرسال تعليق