شوية غزل معنى....
ياحاملة الزهرة علينا الزهر دين
بشوفك بعين ونشكر الحلوة بعين
لاتواخذيني بهالحكي عالحالتين
عم شوف هالزهرة بلوحة ولوحتين
زهرة بإيدك والخدود موردة
يعني بعين الناس صرتو زهرتين
قالت ياعلي دوب بالحلوين دوب
وخلي الشمال يعانق خدود الجنوب
وقالت بعد ترم الصبا وترم الحروب
لازم تتوب وشمسنا قبال الغروب
قلتلها يامدوبي قلبي الطروب
بعدو مشبشب لاصفار ولا شحوب
وبطمنك لو صرت عالعكازتين
وصرت امشي عالتلاتة مابتوب
محبوبتي بالحسن مافي قدها
ومعطرا الدنيا بفوحة ندها
كلمة بحبك بالخجل بتردها
وبتصير تخفي عيونها في يدها
خدودها ورود وحاملة بإيدها ورود
وحيران ع ايا ورود ايدي مدها
شقرا متل الحور المشفى عودها
وغارت شباشيل الدرة من جعودها
نغشة لطيفة بتشعرك بوجودها
وبيشتاق العاشق لشم ورودها
تفاح سرغايا ع كراسي خدودها
وزنبق خرابو من بياض زنودها
لو شافها بالكرم ناطور العنب
بيصيح دوماني العنب عنقودها
علي عبدالنبي
ليست هناك تعليقات:
إرسال تعليق