" شاهد عيان "
بقلم يوسف ونيس مجلع --- ايطاليا بريشيا
اصدقائى الاحباء هذه الكلمة كتبت من قلب الاحداث واذيعت تليفزيونيا فقط فى اكتوبر 2013
وقبل ان تذاع اضيف لها بعض الابيات التى تدعم الوحدة الوطنية والتى لو كتبت
وقتها لما كان لها معنى لان الوحدة الوطنية كانت حالة يعيشها المصريين دون التفكير فيها
او الحديث عنها---الكلمة بالعامية بعنوان شاهد عيان
من ذكريات جندى شاهد عيان ---------- كان له شرف الوجود فى الميدان
شاف البطولات لجيش الشجعان ------ اللى درسها التاريخ وغناها الزمان
حسن و جرجس و رمضان --------------- اللى دمهم اخطلت فى الميدان
كتب ملحمة لكل الازمان ---------------- مصر يامالكة الروح والوجدان
--------------------------------------------------------------------
اقول ايه ولا ايه عن الاعجازات ------ عن بواسل غيرو قواعد ونظريات
لا صواريخ ولا سرعة طيارات -------------- ولا مدافع ولا وزن دانات
ولا تكنولوجيا و قوة ترسانات --------- اللى قالوا هدمه رابع المستحيلات
بارليف اسطورة التحصينات ---------- جبل الحديد و اطنان الخرصانات
انهار تحت رجلينا مخدش ساعات ---- بايمان مالينا النصر باى تضحيات
--------------------------------------------------------------------
بعد النكسة ظهرت كئابة السحاب --------- والوكسة شمتت باظافر وانياب
قالو مصر وقعت ونهارها غاب ----------- بعزها اتهزمت ومجدها شاب
و الدنيا اندهشت عجب واعجاب ------- لما شمسها طلعت فى عز الشباب
انتصارتها رجعت باصرار غلاب ----- القناة صالحت ولادها بدون عتاب
وسيناء حضنت جنودها الاحباب --------- حضن العاشق بعد طول غياب
-------------------------------------------------------------------
اللى انحنى على التراب باسه ---------- واللى بالشكر عبر عن احساسه
واللى بيدمر الاهداف بحماسه ---------------- لا همه العدو ولا متراسه
واللى زرع العلم باخر انفاسه -------------- فخور مبتسم و رافع رائسه
النصر شافنا عمدان فى اساسه ------------ والمجد عرفنا عزوته وناسه
---------------------------------------------------------------------
كنا فدائيين الروح على الكف امارة --- لما طاش ملايين الرصاص بغزارة
ما نقاش المسلمين او النصارى ----- ما لقاش غير المصريين بس بجدارة
شجعان مليانين عزم وجسارة -------- عازمين العبور حتى بدون عبارة
عارفين قد ايه التحديات جبارة ------ مؤمنين الشهادة مكسب مش خسارة
-----------------------------------------------------------------------------
وسط الغام اخطر من الزواحف -------- ومخاطر زحام بالارواح جاحف
بعزيمة كانت فى قلوبنا تتضاعف ---- استمر جيش النصر بايمان زاحف
قلبه عمران صلبان و مصاحف ------ والعدو هربان على اربعة ساحف
بسرعة غزلان و رعب سلاحف ---- تارك عتاد الوان عملنا منه متاحف
-----------------------------------------------------------------------------
هنا من مصر الجميلة الوحيدة ---------- مصر الصابرة الاصيلة العنيدة
هنا من ساحة اكتوبر المجيدة -------------- تحية اجلال للاجيال الجديدة
اجدادكم بسماحة الحب الشديدة ------------ ضحوا بنفوس راضية سعيدة
داسوا جراحهم ضحوا بارواحهم ----------- لاجل بسمة الحفيد و الحفيدة
بقلمى يوسف ونيس مجلع --- مصر
الشاعر /ة / Youssef Megale
تحت إشراف رئيس مجلس الإدارة السفيرة د. منى ضيا (منى داوود ضيا)
ليست هناك تعليقات:
إرسال تعليق