✍ شعب برائحه الموت ✍
وتعددت الاسباب والموت واحد لكن باختلاف الاقدار قدرك مكتوب فوق جبينك عايش بيه ماشي بيه زى ظلك لحد مايجي وقته وينفذ تعيش وتفارق ده قدر تتغرب عن اهلك ده قدر تعيش فى فقر مدقع ده قدر تموت ده قدر لكن موت الفجاءه مصيبه وقدر اللهم اجرنا منها يارب العالمين
كنا زمان فى كل الاقاويل نقول رائحه الموت تأتي زحفآ وغيوم الخرائب لا تنقشع لكن فجاءه رائحه الموت تأتي هروله تأكل الاخضر واليابس من سكينه وطمأنينه الشعب
وتزحف الايادى الخفيه تنخر فى عظام الوطن فتتعاظم خطيئه المسؤلين ويتهالك المتهالكون وتتهالك افئده المواطنون كالعاده
وتصبح الفجيعه فى ازدياد كل يوم عن الاخر وكل يوم مانشيت على الصحف اقرى الحادثه وصحف بلون وحبر الدم حريق هائل بقطار ،، وعدد ضحايا لا يوصف
انفجار عبوه ناسفه ،،، وضحايا لا تعد
عمليه استشهاديه ،،، وضحايا لا ذنب لها غير المرور بمحض الصدفه
تفجير على الحدود ،،، وشهداء واجب لا تُنسى
اعدام زهره شباب ،،،، ودموع امهات ثكلى لا تجف
الوطن يعيش مرحله تجويع للوعي قبل البطون
خنق للاراده وخرس جماعي
غاب العقل وبدأنا نتصور سيلفي على انقاض بعض
زمان كنا نقرى عن اى حادث بجريده وحاله من الصعبنه والحزن لما أل اليه كل متضرر
لكن الان لا نحتاج لنقرأ فالموت زاحف بكل مايحيط بك
واصبح الشعب معلق باطراف خيوط الماريونيت
واصبحنا عرائس لا حول لنا ولا قوه
زود اسعار وقلل السلعه....انزلي بقى بدعم من السلطه تشكري ياحكومه
امنع علاج وزود ثمنه للضعف.....انزلى بقى بكشوفات وتحاليل عقيمه لكل الشعب ليس لها رجاء ولا منها اى نفع تشكري ياحكومه
اهمال وعدم صيانه للمنشأت الحياتيه.... انزل بقى بكبش الفدا سواق غلبان راح ضحيه زيه زي اللى راحوا ...وانزلى ياحكومه باكبر قرار علشان الشعب يهدى ((استقاله وزير ))
ده على اساس ان الوزير ده كان ليه دور مااحنا عارفين انه زيه زي غيره برفان ومع اول كارثه هيتشال علشان نحجم غضب الشعب
جوع...جوع...جوع...واطلق كلاب تنهش فى لحوم البشر
حتى الكلاب اتسعرت بسبب الجوع وبدات تنهش فى الخلق
وتزيد رائحه الموت بكل شبر بأرض الوطن.... وانزل بالتقيل الراسي بقى فيلم لخالد يوسف يبكي البشر ويضحك على عقولهم ويفكرهم بمصابهم لكن مع شويه دلع وشخلعه ماهو الشئ لزوم الشئ على اساس الشعب نايم فى العسل
لكن للاسف الشعب اندهس...اتفرم...اتفجر...اتعدم.....اتعض... اتحرق....
اليوم بقولها بلسان كل فرد فى الشعب للمسؤول الكبير
((نحن خصمائك يوم القيامه))
يوم تأزف الازفه سيقف كل مسؤول معلق برقبته رقاب كل الضحايا ووستفوح وتتسرب من بين اصابعه دماء كل الضحايا
شكرا ياحكومه
رساله من مواطنه غلبانه مش عارفه لما تخرج من بيتها هترجع ولا لا
رحم الله كل شهيد خرج من بيته ومرجعش
✍ أمل مخيمر ✍
ليست هناك تعليقات:
إرسال تعليق